世界盃上周五開鑼了,已經進行了五天的賽事,沒有看足全部賽事,只選了想看或時間許可的。德國後防唔惦,英格蘭無左朗尼又好唔惦,千里達的意外驚喜,法國的繼續失望,總結了這幾天的諗法!

或許只是分組賽的第一場賽事,一切都有待改善,德國乃主辦國,但後防仲係咁水平睇怕縱有主場之利都難有好成績。

或者係格食格,法國同瑞士上兩次對賽都和波,今次亦唔例外,其實法國贏唔到,我覺得都要賴埋領隊一份,下半場韋托特靜到好似無佢在場咁都唔換,反而換走唯一叫做有d側擊能力的22號仔,錯哂呀!唔知今屆法國會唔會重蹈覆轍好似上屆咁一球不入,雖然下場係對南韓,不過體力化的南韓遇著法國老人大軍,法國唔好咁樂觀~

被視為包尾大隊熱門之一的千里達,雖然只係守和瑞典,但成隊波好有士氣,打少一個都仲守到瑞典,龍門更係打到上咗身,瑞典失分對同組英格蘭有利,開心之餘亦替英格蘭擔心,下場英格蘭正面對千里達,與第一場分組賽黎講,英格蘭的攻擊能力比瑞典低幾皮,好擔心聽晚英格蘭對千里達又係爆冷賽果…

至於英格蘭,希望真如球評家所分析的保留實力,keep住第一場的狀態與表現,真係死得,唔明點解為咗一個長人高諾治就可以只打高波,成場波根本無威脅過對方龍門咁濟,無一個攻勢係漂亮,朗尼唔係救世主,但無咗朗尼好似真係好唔惦咁喎,究竟幾時復出?




    全站熱搜

    小塵埃 發表在 痞客邦 留言(0) 人氣()